食食食

今個週末，想唔到有咩特別想做，加上天氣又濕又有小小涷，唔想老婆粗身大細吹風，所以都係係旺區同mall入面行下。

之前係Open Rice睇到有兩間野幾多好評，但一直未有機會去試，就趁呢兩日去。

星期六:

去左呢間八八八拉面，老實講，自從係北海道食過拉面後，覺得超好味道之後，連係大阪食的拉面都唔太喜歡，所以係香港食的拉面都唔會有咩太高expectation，不過見呢間係網上咁多好評，就去試下。

叫左兩個lunch set，每個都係一個half size拉面加一個細飯再加softdrink。味道可以，唔係太多味精，係用日本米，飽就一定夠飽了，如個一男一女唔係太肚餓的話，一個 lunch set 都夠食添。個人覺得好過老千拉面好多。

相就無影因為個pocket PC 有小小問題，影相唔清。

星期日:

網上對呢間金船長有好多好多好評，不過佢位置真係超難搵，因為附近係舊區又無地鐵，好彩老婆記得有小巴到附近，加上我有pocket pc phone 在手可以即時上網，上網搵左小巴資料同一直開住Google Maps 同 GPS，可以好容易搵到。

去到門口已經係2pm，但都要等位。入到去見到全院滿座，即時上網睇下前人有咩介紹，就叫左漢堡包、海鮮墨汁意粉同埋朱古力心太軟。

漢堡包叫左7成熟，味道好但不及灣仔188 IVE 對面的好食。

海鮮墨汁意粉好夠熱，海鮮難得有鮮味，好食。

朱古力心太軟係一個內有溶化左的朱古力的朱古力小蛋糕，佢再有小小的一scoop ice cream，主角朱古力小蛋糕好好味，入面溶化左的朱古力有中度苦味，所以食起來唔會太甜，非常好食。

食完走時，門口都有唔小人排隊，都已經係2:30pm左右了。